Կուբան և Միացյալ Նահանգները այս պահին հաղորդակցվել են իրենց երկկողմ հարաբերությունների վերաբերյալ, սակայն լիարժեք երկխոսություն դեռ չի սկսվել։ Այս մասին CNN հեռուստաալիքին հայտնել է Կուբայի ԱԳՆ փոխնախարար Կառլոս Ֆերնանդես դե Կոսսիոն։
«ԱՄՆ կառավարությունը գիտի, որ Կուբան վաղուց պատրաստ է բովանդակային երկխոսության մեր երկկողմ հարաբերությունների շուրջ։ Այս պահին մենք հաղորդակցվել ենք, բայց դեռ հնարավոր չէ ասել, որ սկսել ենք երկկողմ երկխոսություն», – նշել է դիվանագետը՝ հավելելով, որ հաղորդակցությունը տեղի է ունեցել «բարձր մակարդակով»։
Միաժամանակ, փոխնախարարը ընդգծել է, որ Հավանան պատրաստ չէ քննարկել իր սահմանադրական համակարգում փոփոխություններ կատարելու հարցը։ Նա նաև ավելացրել է, որ Կուբան որևէ սպառնալիք չի ներկայացնում ԱՄՆ-ի համար, «չի հակադրվում, չի աջակցում ահաբեկչությանը և չի հովանավորում այն», ինչպես նաև պատրաստ է համագործակցել Վաշինգտոնի հետ դեղորայքային առևտրի դեմ պայքարում։
