Եվրամիությունը կմնա եվրոպական միայն անունով՝ առանց գաղափարների և արժեքների, եթե արմատապես չփոխի իր կուրսը։ Այդ մասին հայտարարել է Վրաստանի խորհրդարանի խոսնակ Շալվա Պապուաշվիլին։
«Եթե Բրյուսելը արմատապես չփոխի իր կուրսը, Եվրամիությունը կմնա եվրոպական միայն իր անվամբ՝ առանց գաղափարների, արժեքների և բովանդակության», — գրել է Պապուաշվիլին Facebook սոցիալական ցանցում։
Պապուաշվիլին նշել է, որ հոկտեմբերի 4-ից անցել է ուղիղ չորս ամիս, երբ ընդդիմությունը հավաքել էր բազմահազարանոց հանրահավաք և փորձել էր գրոհել Թբիլիսիում գտնվող նախագահական պալատը։
«Այս ընթացքում արդեն մեկ բան հստակ է դարձել՝ Բրյուսելը այդպես էլ չի դատապարտի նախագահական պալատի վրա հարձակումը», — ընդգծել է խորհրդարանի խոսնակը։
Ավելին, Պապուաշվիլիի խոսքով՝ փորձեր են արվում ներկայացնել գրոհը, որի հետևանքով տուժել է ավելի քան 20 ոստիկան, որպես «ցանկապատի հարց»՝ նկատի ունենալով նախագահական նստավայրի դիմաց տեղադրված ցանկապատը, որը ճեղքել էին ցուցարարները։
