Ռուսաստանը և Ուկրաինան հայտնել են մեկը մյուսի ուղղությամբ արձակած տասնյակ անօդաչու թռչող սարքեր խոցելու մասին։ Ըստ ՌԴ պաշտպանության նախարարության՝ երկրի հակաօդային պաշտպանության ուժերը գիշերը կալանել և ոչնչացրել են ուկրաինական 83 ինքնաթիռային տիպի ԱԹՍ Ռուսաստանի տարածաշրջանների օդային տարածքում:
ԱԹՍ-ները խոցվել են Կուրսկի, Բրյանսկի, Վորոնեժի, Օռլովի, Բելգորոդի մարզերի, ինչպես նաև Ղրիմի օդային տարածքում։
Բրյանսկում, ըստ նահանգապետի, բնակելի տան վրա իրականացված գրոհի հետևանքով մեկ մարդ է վիրավորվել։ Ուկրաինայի ռազմաօդային ուժերն էլ հայտնել են, որ գիշերը ռուսական կողմը երկրի վրա է արձակել 48 ԱԹՍ և 3 կառավարվող ավիացիոն հրթիռ: Ըստ գերատեսչության՝ 31 ԱԹՍ հաջողվել է խոցել։ Սումիի մարզում ռուսական գնդակոծությունների հետևանքով, ըստ տեղի վարչակազմի, 82 պայթյուն է գրանցվել։ Կա մեկ վիրավոր։
