Ֆրանսիան կողմ կքվեարկի Եվրամիության մակարդակով նոր պատժամիջոցների սահմանմանը մի շարք իրանցի պաշտոնյաների և ուժային կառույցների ներկայացուցիչների նկատմամբ՝ հակակառավարական բողոքի ցույցերի ճնշման համար, ինչպես նաև կաջակցի
Իրանի Իսլամական հեղափոխության պահապանների կորպուսը (ԻՀՊԿ, Իրանի զինված ուժերի էլիտար ստորաբաժանումներ) ահաբեկչական կազմակերպություն ճանաչելու նախաձեռնությանը։ Այդ մասին հայտարարել է Ֆրանսիայի արտաքին գործերի նախարար Ժան-Նոել Բարոն՝ Բրյուսելում ԵՄ արտաքին գործերի նախարարների հանդիպմանը ժամանելիս։
«Այսօր մենք կհամաձայնեցնենք եվրոպական պատժամիջոցներ այն անձանց նկատմամբ, ովքեր պատասխանատու են հակակառավարական ցույցերի ճնշման համար», — նշել է նա։
Բարոյի խոսքով՝ խոսքը վերաբերում է «ավելի քան 20 ֆիզիկական և իրավաբանական անձանց», որոնց նկատմամբ կկիրառվի Եվրամիության տարածք մուտք գործելու արգելք, ինչպես նաև կսառեցվեն նրանց ֆինանսական ակտիվները։ Այդ անձանց թվում են ինչպես ԻՀՊԿ անդամներ, այնպես էլ Իրանի կառավարության ներկայացուցիչներ, դատախազներ և ոստիկանության ղեկավարներ։
«Հավանաբար, մենք պետք է գնանք էլ ավելի հեռու։ Հենց այդ պատճառով Ֆրանսիան հայտարարել է, որ կաջակցի ԻՀՊԿ-ի՝ ԵՄ ահաբեկչական կազմակերպությունների ցանկում ընդգրկմանը», — հավելել է նախարարը։
