Եվրոպական դիվանագիտության ղեկավար Կայա Կալլասը բացառել է ՆԱՏՕ-ին զուգահեռ եվրոպական բանակ ստեղծելու հնարավորությունը։
«Եվրոպական յուրաքանչյուր երկիր արդեն ունի իր բանակը, իսկ ԵՄ 23 երկրներ նաև ՆԱՏՕ-ի անդամ են, ուստի չեմ կարող պատկերացնել, որ նրանք կստեղծեն ևս մեկ առանձին եվրոպական բանակ», — հայտարարել է Կալլասը ԵՄ արտաքին գործերի նախարարների հանդիպմանը ժամանելիս՝ պատասխանելով ուկրաինացի լրագրողների հարցին այն հնարավորության վերաբերյալ, որ եվրոպական բանակի կորիզը «կարող են կազմել Ուկրաինայի զինված ուժերը»։
«Զինված ուժերը պետք է ունենան հստակ հրամանատարական կառուցվածք՝ ով ում է ենթարկվում։ Եթե սկսենք ստեղծել զուգահեռ կառույցներ, դա միայն կխճճի ընդհանուր պատկերը», — ընդգծել է նա։
Ավելի վաղ ՆԱՏՕ-ի գլխավոր քարտուղար Մարկ Ռյուտեն, ելույթ ունենալով Դավոսի Համաշխարհային տնտեսական ֆորումում, հայտարարել էր, որ ԵՄ երկրները չեն կարող ապահովել Եվրոպայի անվտանգությունը առանց ԱՄՆ-ի մասնակցության և կոչ էր արել եվրոպացիներին «դադարեցնել երազել»։
