Թուրքիայի նախագահ Ռեջեփ Թայիփ Էրդողանը ԱՄՆ նախագահ Դոնալդ Թրամփին առաջարկել է Իրանի հարցով անցկացնել եռակողմ գագաթնաժողով։ Այդ մասին հայտնում է Թուրքիայի իշխանամետ Hürriyet թերթը։
Թերթի տվյալներով՝ Էրդողանն այդ առաջարկը փոխանցել է հունվարի 27-ին ԱՄՆ նախագահի հետ ունեցած հեռախոսազրույցի ընթացքում։ Թուրքիայի առաջնորդը հանդես է եկել ԱՄՆ-ի, Իրանի և Թուրքիայի մասնակցությամբ բարձր մակարդակի հանդիպում անցկացնելու նախաձեռնությամբ՝ հնարավոր է՝ տեսաժողովի ձևաչափով։ «Հաղորդվում է, որ Թրամփը դրական է վերաբերվել Էրդողանի այս առաջարկին», — գրում է պարբերականի մեկնաբան Հանդե Ֆըրաթը։
Hürriyet-ը նաև տեղեկացնում է, որ Իրանի արտաքին գործերի նախարար Աբբաս Արաղչին այս շաբաթ կայցելի Թուրքիա՝ բանակցություններ վարելու իր թուրք գործընկեր Հաքան Ֆիդանի հետ։ Այցի կոնկրետ ժամկետները չեն նշվում։
Թուրքիայի և Իրանի արտաքին գործերի նախարարները վերջին անգամ հեռախոսազրույց են ունեցել հունվարի 28-ին։ Զրույցի ընթացքում քննարկվել են Իրանի շուրջ վերջին զարգացումները և տարածաշրջանում լարվածության թուլացման ուղղությամբ ձեռնարկվող քայլերը։
