Իրանի բանակի զինծառայողները ուշադիր հետևում են ԱՄՆ Զինված ուժերի բոլոր շարժումներին Մերձավոր Արևելքում և ձեռնարկում են անհրաժեշտ քայլերը՝ երկրի պաշտպանունակությունը ամրապնդելու համար։ Այս մասին հայտարարել է Իսլամական Հանրապետության ԱԳՆ ներկայացուցիչ Էսմայիլ Բաղային՝ մեկնաբանելով ԱՄՆ նախագահ Դոնալդ Թրամփի խոսքերը, թե տարածաշրջան ուղարկվելու են բազմաթիվ ամերիկյան նավեր։
«Տարածաշրջան ուղարկված ցանկացած նավ ոչ մի կերպ չի ազդի Իրանի հաստատակամության և վճռականության վրա՝ պաշտպանելու իր ինքնիշխանությունը։
Հետևաբար, Իրանի Իսլամական Հանրապետության Զինված ուժերը ուշադիր հետևում են բոլոր շարժումներին և, միևնույն ժամանակ, ոչ մի վայրկյան չեն վատնում՝ ամրապնդելու իրենց պաշտպանունակությունը, պաշտպանելու ազգային ինքնիշխանությունը և երկրի արժանապատվությունը»,-ընդգծել է Բաղային շաբաթական մամուլի ասուլիսի ժամանակ։
