Թուրքիայի ԱԳ նախարարն աջակցել է Փաշինյանին, սակայն նշել՝ «Հայաստանը պետք է լուծի մի քանի ներքին հարցեր»

Թուրքիայում ուշադիր ուսումնասիրել են TRIPP շրջանակային փաստաթուղթը, հայտարարել է Թուրքիայի արտգործնախարար Հաքան Ֆիդանը։

Ֆիդանը նշել է, որ փաստաթղթի վերաբերյալ որոշ տեխնիկական հարցեր են շարունակում մնալ։ «Մենք շատ ուշադիր ուսումնասիրել ենք փաստաթուղթը։ Երեկ ես երկու ժամ քննարկել եմ դրա բովանդակությունը իմ հարգարժան գործընկեր Ջեյհուն Բայրամովի հետ՝ նրանց մեկնաբանությունը հասկանալու համար։ Նրանց կարծիքը կարևոր է մեզ համար», - ընդգծել է թուրք նախարարը։

Նա հավելել է, որ փաստաթղթի վերաբերյալ տեղեկությունը փոխանցվել է Թուրքիայի նախագահին, և գլխավոր նպատակը մնում է նույնը՝ Հայաստանի և Ադրբեջանի միջև վերջնական համաձայնագրի ստորագրում և Թուրքիայի ու Հայաստանի միջև հարաբերությունների հետագա կարգավորում, որը կստեղծի կայունություն և բարգավաճում տարածաշրջանում։

Ֆիդանը նշել է, որ Ադրբեջանում, Հայաստանում և Թուրքիայում ներկայումս կա քաղաքական կամք այս գործընթացը առաջ մղելու համար։ Նա նաև ընդգծել է, որ Հայաստանը պետք է լուծի մի քանի ներքին հարցեր, հատկապես հունիսին կայանալիք ընտրությունների լույսի ներքո։ «Մենք տեսնում ենք, որ պարոն Փաշինյանը առաջատար է հասարակական կարծիքի հարցումներում, և աջակցում ենք նրա կառուցողական դերին», - ասել է նախարարը։

Թուրքիայի արտգործնախարարը ընդգծել է, որ տարածաշրջանում կայունությունն ու խաղաղությունը կախված են երկրների միավորումից և վստահության կառուցումից։ «Եթե վերլուծենք տարածաշրջանի քրոնիկ խնդիրները, կտեսնենք, որ դրանց մեծ մասը հիմնված է վստահության պակասի վրա։ Սա ստեղծում է ճեղքեր և խնդիրներ. արտաքին գերիշխանությունը կամ ներքին ահաբեկչական կազմակերպությունները կարող են անկայունություն և քաղաքացիական հակամարտություն հրահրել», - նշել է Ֆիդանը։

Նա հավելել է, որ տարածաշրջանի բոլոր երկրները պետք է պարտավորվեն ապահովել միմյանց անվտանգությունը, ինչը կլուծի առկա խնդիրների մոտ 80%-ը։ «Անհրաժեշտ է ստեղծել անվտանգության համագործակցության հարթակ, որպեսզի տարածաշրջանի երկրները կարողանան վստահել միմյանց», - եզրափակել է թուրք նախարարը։