ԱՄՆ Պետդեպարտամենտը խորհուրդ է տվել Իրանում գտնվող իր քաղաքացիներին անհապաղ լքել երկիրը ցամաքային ճանապարհով՝ թուրքական կամ հայկական սահմանով։ Համապատասխան ծանուցումը տեղադրվել է Պետդեպարտամենտի կայքում։
«ԱՄՆ քաղաքացիները պետք է անհապաղ լքեն Իրանը։ Եթե դա անվտանգ է, դիտարկեք Իրանից ցամաքային ճանապարհով Թուրքիա կամ Հայաստան մեկնելու հնարավորությունը», - ասվում է հայտարարության մեջ՝ որպես առաջարկության հիմնավորում նշելով Իրանում շարունակվող անկարգությունները։
Քաղաքացիներին խորհուրդ է տրվում ինքնուրույն ստանձնել Իրանից իրենց դուրս գալու պատասխանատվությունը՝ առանց ԱՄՆ կառավարության օգնության: ԱՄՆ և Իրանի քաղաքացիություն ունեցող անձինք պետք է լքեն երկիրը՝ օգտագործելով իրենց իրանական անձնագրերը:
ԱՄՆ իշխանությունները նաև խորհուրդ են տալիս չլքել Իրանը Աֆղանստանի, Իրաքի կամ Պակիստանի միջոցով:
