Գազայի հատվածում 2025 թվականի հոկտեմբերի 9-ին հրադադարի հաստատումից ի վեր զոհվել է ավելի քան 100 երեխա, իսկ հարյուրավորները վիրավորվել են, հայտնել է ՅՈՒՆԻՍԵՖ-ի մամուլի խոսնակ Ջեյմս Էլդերը։
«Հոկտեմբերի սկզբին հրադադարի հաստատումից ի վեր Գազայում սպանվել է ավելի քան 100 երեխա», - ասել է նա Ժնևում կայացած ճեպազրույցի ժամանակ։ «Դա նշանակում է, որ հրադադարի ընթացքում այստեղ ամեն օր սպանվել է մոտավորապես մեկ տղա կամ աղջիկ»։
Էլդերը նշել է, որ այս թիվը «արտացոլում է միայն այն միջադեպերը, որոնց վերաբերյալ բավարար մանրամասն տեղեկատվություն կա»։ Նա հավելել է, որ երեխաների մահացության իրական թիվն ավելի բարձր է՝ հարյուրավոր երեխաներ վիրավորվել են։
«Կյանքը Գազայում շարունակում է մնալ ծանր, իսկ գոյատևումը հարցականի տակ է։ Չնայած հրադադարի ընթացքում ռմբակոծություններն ու հրետակոծությունները նվազել են, դրանք չեն դադարել», - եզրափակել է Էլդերը։
2025 թվականի հոկտեմբերի 9-ին Իսրայելը և արմատական պաղեստինյան «Համաս» շարժումը, Եգիպտոսի, Կատարի, ԱՄՆ-ի և Թուրքիայի միջնորդությամբ, համաձայնեցին իրականացնել Թրամփի կողմից ներկայացված խաղաղության ծրագրի առաջին փուլը։
