Կուբան 66 տարի է, ինչ գտնվում է Միացյալ Նահանգների հարձակման տակ և պատրաստ է պաշտպանել իր անկախությունը մինչև արյան վերջին կաթիլը։ Այս մասին հայտարարել է Կուբայի նախագահ Միգել Դիաս-Կանելը՝ պատասխանելով ԱՄՆ նախագահ Դոնալդ Թրամփի հայտարարություններին։
«Կուբան ազատ, անկախ և ինքնիշխան երկիր է։ Ոչ ոք մեզ չի թելադրում, թե ինչ անել։ Կուբան չի հարձակվում. Միացյալ Նահանգները հարձակվում է նրա վրա արդեն 66 տարի։ Կուբան չի սպառնում. այն պատրաստվում է և պատրաստ է պաշտպանվել մինչև արյան վերջին կաթիլը», – գրել է Դիաս-Կանելը X-ում։
Նա նշել է, որ Միացյալ Նահանգները բարոյական իրավունք չունի որևէ բանի համար մեղադրել Կուբային, քանի որ հենց ամերիկյան իշխանություններն են «ամեն ինչ, այդ թվում՝ մարդկային կյանքերը, վերածում բիզնեսի»։«Նրանք, ովքեր հիմա հիստերիկորեն հարձակվում են մեր երկրի վրա, զայրույթով են լցված մեր ժողովրդի՝ սեփական քաղաքական մոդելը ընտրելու ինքնիշխան որոշման պատճառով։
Նրանք, ովքեր մեղադրում են հեղափոխությանը մեր ապրած ծանր տնտեսական դժվարությունների համար, պետք է ամաչեն, քանի որ գիտեն և խոստովանում են, որ սա այն դաժան խեղդամահության միջոցների արդյունքն է, որոնք Միացյալ Նահանգները վեց տասնամյակ շարունակ ձեռնարկել է մեր դեմ և այժմ սպառնում է խստացնել դրանք», – հավելել է նախագահը։
Հունվարի 11-ին ԱՄՆ նախագահ Դոնալդ Թրամփը հայտարարեց, որ Կուբան այլևս նավթ և գումար չի ստանա Վենեսուելայից։
