Մեծ Բրիտանիայի կառավարությունը 200 միլիոն ֆունտ ստեռլինգ (268 միլիոն դոլար) է հատկացրել Ուկրաինայում բրիտանական զորքերի հնարավոր տեղակայմանը նախապատրաստվելու համար՝ հրադադարից հետո։ Այս մասին հայտարարել է Մեծ Բրիտանիայի պաշտպանության նախարար Ջոն Հիլին Կիև կատարած այցի ժամանակ։
«Պաշտպանության նախարարն այսօր (հունվարի 9-ին) հաստատեց, որ այս տարվա համար հատկացվել է 200 միլիոն ֆունտ ստեռլինգ, որը հատուկ կուղղվի Ուկրաինա բազմազգ ուժերի հնարավոր տեղակայման նախապատրաստական աշխատանքների ֆինանսավորմանը»,-ասվում է Մեծ Բրիտանիայի պաշտպանության նախարարության կողմից տարածված հաղորդագրության մեջ։
Նշվում է, որ միջոցները կօգտագործվեն «տրանսպորտային միջոցների, կապի համակարգերի արդիականացման, անօդաչու թռչող սարքերի դեմ պայքարի նոր համակարգերի ներդրման, ինչպես նաև անձնակազմի պաշտպանության լրացուցիչ սարքավորումների ներդրման համար՝ անհրաժեշտության դեպքում զորքերի տեղակայման պատրաստությունն ապահովելու համար»։
