«Ժողովուրդ» օրաթերթը գրում է.
«2023 թվականին Երևանի ավագանու ՔՊ-ական անդամի մանդատը ստացած Միքայել Խաչատրյանը, ով ծնվել է 2000 թվականին, 2024 թվականին գնել է 20 մլն դրամ արժողությամբ բնակարան Ավան վարչական շրջանակում։
Խաչատրյանը ներկայացնելով պաշտոնատար անձի տարեկան հայտարարագիր չի հայտարարագրել որևէ տրանսպորտային միջոց։ Խաչատրյանը թեպետ երիտասարդ տարիքում դարձել է ավագանի և քաղաքային իշխանության ներկայացուցիչ, սակայն կենսագրական որևէ մի տող Երևանի քաղաքապետարանի պաշտոնական կայքում չկա։
Խաչատրյանի բանկային հաշիվների մնացորդները կազմել են 1 մլն դրամ, տարեսկզբի համեմատ կրճատվելով 500 հազար դրամով։ Կանխիկ դրամական միջոցներն աճել են 200 հազար դրամով՝ 500 հազար դրամից դառնալով 700 հազար դրամ։
Հաշվետու ժամանակահատվածի եկամուտները կազմել են 6 մլն 547 հազար դրամ, որից 1 մլն դրամը այլ եկամուտ է ՀՀ Պետեկամուտների կոմիտեից, իսկ 5 մլն 547 հազար դրամը «Քաղաքացիական Պայմանագիր» կուսակցությունից՝ որպես աշխատանքի վարձատրություն։
Ստացված վարկերի և փոխառությունների մայր գումարի մնացորդը հաշվետու տարվա դեկտեմբերի 31-ի դրությամբ կազմել է 18 մլն 350 հազար դրամ, որից 18 մլն դրամը բնակարանի հիպոտեկի մայր գումարի մնացորդն է։
Ըստ հայտարարագրի Միքայել Խաչատրյանը «Քաղաքացիական Պայմանագիր» կուսակցության աշխատակազմի ղեկավարի տեղակալն է։ Բացի սա, սեպտեմբերին կայացած վարչության ընտրություններում, հավաքելով 417 ձայն, ընդգրկվել է ՔՊ Վերահսկող հանձնաժողովի անդամների ցանկում։ Ըստ մեր աղբյուրների ՔՊ վերնախավը ամեն բան անում է ՔՊ թիմում Միքայել Խաչատրյանի առաջընթացն ապահովվելու համար:
Վերջինս շատ լավ հարաբերություններ ունի ՔՊ վարչության կազմի հետ: Ու չի բացառվում, որ խորհրդարանական ընտրություններից հետո երիտասարդն իր կապերի շնորհիվ կարողանա «յուղոտ» պաշտոն զբաղեցնել»։
Մանրամասները՝ «Ժողովուրդ» օրաթերթի այսօրվա համարում:
