Հունգարիայի վարչապետ Վիկտոր Օրբանը հայտարարել է, որ Վենեսուելայում իրականացված ԱՄՆ ռազմական գործողությունը վկայում է լիբերալ աշխարհակարգի փլուզման մասին։ Այդ մասին նա գրել է Facebook սոցիալական ցանցում՝ նշելով, որ աշխարհը մտնում է ավելի անկայուն և վտանգավոր փուլ։
Օրբանի խոսքով՝ տարվա առաջին օրերը ցույց տվեցին, որ նախկին կարգը քանդվում է, իսկ ԱՄՆ նախագահ Դոնալդ Թրամփի ընտրվելը դարձել է այդ փոփոխությունների խորհրդանշական պահերից մեկը։ Նա ընդգծել է, որ նոր աշխարհակարգը դեռ ձևավորման փուլում է, իսկ առաջիկա տարիները լինելու են անկանխատեսելի և լարված։Հունգարիայի վարչապետը նաև նշել է, որ ապրիլին երկիրը կանգնած է կարևոր ընտրության առաջ՝ ակնարկելով առաջիկա խորհրդարանական ընտրությունները, որոնք կանցկացվեն քայքայվող աշխարհակարգի պայմաններում։
Հիշեցնենք, որ հունվարի 3-ի գիշերը ԱՄՆ զինված ուժերը հարվածներ էին հասցրել Վենեսուելայի մի շարք օբյեկտների, ինչից հետո, ըստ Վաշինգտոնի հայտարարությունների, Վենեսուելայի նախագահ Նիկոլաս Մադուրոն տեղափոխվել է ԱՄՆ՝ դատավարության համար։
