Ադրբեջանի նախկին փոխվարչապետը հետախուզվում է

Ադրբեջանի Պետական ​​Անվտանգության Ծառայությունը (ՊԱԾ) ևս մեկ որոշում է կայացրել Ռամիզ Մեհդիևի և պետական ​​իշխանությունը զավթելու մեջ մեղադրվող այլ անձանց դեմ հարուցված քրեական գործով։

Ինչպես հաղորդում են ադրբեջանական լրատվամիջոցները, քրեական գործով հավաքված նյութերի հիման վրա որոշում է կայացվել քրեական հետապնդման ենթարկել Ադրբեջանի նախկին առաջին փոխվարչապետ Աբբաս Աբբասովին, որը տարիներ շարունակ խուսափել է քրեական հետապնդումից Ռամիզ Մեհդիևի հովանավորության շնորհիվ։ Աբբասովի նկատմամբ հայտարարվել է հետախուզում։

Նշենք, որ Աբբաս Աբբասովը 1992 թվականից ի վեր զբաղեցրել է Ադրբեջանի առաջին փոխվարչապետի պաշտոնը։ 2006 թվականին պաշտոնից ազատվելուց հետո նա տեղափոխվել է Ռուսաստանի Դաշնություն։

Ադրբեջանական լրատվամիջոցների բնորոշմամբ՝ «վերջին մի քանի տարիների ընթացքում Աբբասովը զբաղվել է դիվերսիոն գործունեությամբ, որի նպատակն էր տարբեր անօրինական միջոցներով զավթել Ռուսաստանում գտնվող ադրբեջանական սփյուռքի կառույցների վրա վերահսկողությունը»։

Նա դարձավ 2012 թվականին ստեղծված և բոլորին հայտնի որպես «Միլիարդատերերի միություն» հայտնի «Ռուսաստանի ադրբեջանական կազմակերպությունների միության» հիմնադիրն ու ղեկավարը:

Ադրբեջանում նշում են, որ ստացված տեղեկատվության համաձայն՝ քրեական գործի նյութերում ներառվել են վերոնշյալ անձանց և կազմակերպությունների միջև կնքված համաձայնագրերի համաձայն՝ տարբեր ուղիներով Ադրբեջան փոխանցված միջոցների, այդ գործարքների և գործընթացների մասնակիցներին տրված խոստումների աուդիո և տեսաձայնագրությունների, արտասահմանում հանդիպումների վերաբերյալ նյութերի և Ադրբեջանում սահմանադրական պետական ​​իշխանության բռնի զավթման ծրագրերի վերաբերյալ տեղեկություններ, որոնք լայնորեն կհրապարակվեն բաց դատավարության ընթացքում։

Հիշեցնենք, որ Ադրբեջանի նախագահի աշխատակազմի նախկին ղեկավար Ռամիզ Մեհդիևը մեղադրվում է Ռուսաստանի հետ կապերի, Ադրբեջանում հեղաշրջման փորձ իրականացնելու համար։