Բոլոր «newsroom»-ներում ընդունված է կախել տարբեր քաղաքների ժամը ցույց տվող ժամացույցները, որովհետև երբ, ենթադրենք ասվում է, որ օրինակ, Սինգապուրում կլինի այսինչ միջոցառումը տեղական ժամանակով այսինչ ժամին, միշտ այդպես նշվում է, որ երկրում աշխատող լրագրողը իմանա, թե տեղի ժամանակով դա որ ժամին է:
Այս մասին այսօր՝ լրագրողների հետ զրույցում նշեց Հանրային ռադիոյի տնօրենի պաշտոնակատար Արմեն Քոլոյանը՝ անդրադառնալով Հանրային ռադիոյի շենքում Բաքվի ու Անկարայի ժամերը ցույց տվող ժամացույցներ տեղադրելուն, որոնք աշխատակիցները հեռացրել են։
Դիտարկմանը, որ դա պաշտոնական Բաքվին հաճոյանալու ձև է, Քոլոյանն արձագանքեց՝ նշելոց, թե իրեն ամենաքիչը հետաքրքրում է, թե պաշտոնական Բաքվում ինչ են մտածում մեր մասին:Հարցին՝ այդ ժամացույցները կախելիս չէ՞ր մտածել, որ կարող է հակազդեցություն առաջանալ, Քոլոյանը պատասխանեց.
«Իսկապես չեմ մտածել, որովհետև «Ազատություն» ռադիոկայանում, որտեղ ես աշխատել եմ 32 տարի, այնտեղ Ադրբեջանի, Հայաստանի, Վրաստանի, և իրար հետ կռիվ անող Ուկրաինայի ու Ռուսաստանի դրոշները կողք-կողքի դրված էին: Ես դա դիտում եմ որպես ընդհանրապես մոտեցում: Եթե մենք որոշենք, որ ընդհանրապես չկա Բաքու, եկեք աչքներս փակենք և ասենք՝ չկա Բաքու ու վերջ:
Բայց մեկ է՝ կա»։Նա ընդգծեց, որ ինքը կոլեկտիվի հետ խոսել է և որոշել են Բաքվի ժամացույցը հանել:Հարցին՝ Ադրբեջանին թշնամի համարում է, թե ոչ, Քոլոյանը պատասխան չտվեց, միայն նշեց, թե քաղաքական հարցերի չի պատասխանում։«Եթե ես ասեմ՝ թշնամի է, կամ թշնամի չէ, դա կլինի քաղաքական գնահատական:
Հանրային ռադիոյի գործադիր տնօրենը քաղաքական գնահատականներ չի տալիս»,- նշեց նա։
Աղբյուր` Փաստինֆո
