Եվրահանձնաժողովի նախագահ Ուրսուլա ֆոն դեր Լայենը Հարավային Աֆրիկայում կայանալիք G20-ի նախօրեին կայացած մամուլի ասուլիսում հայտարարել է, որ Ուկրաինայի համար ԱՄՆ հրապարակված 28 կետից բաղկացած խաղաղության ծրագիրը կքննարկի ԵՄ առաջնորդների՝ Վլադիմիր Զելենսկու հետ և G20-ի շրջանակներում։
«Երեկ հրապարակվել է 28 կետից բաղկացած ծրագիր։ Մենք կքննարկենք իրավիճակը ԵՄ առաջնորդների և այստեղ ներկա առաջնորդների հետ՝ G20-ի շրջանակներում։ Ես նաև կկապվեմ նախագահ Զելենսկիի հետ՝ այս հարցը քննարկելու համար։ Մեկ բան կարևոր է՝ հիմնական սկզբունքը, որին մենք միշտ հետևել ենք. ոչինչ Ուկրաինայի մասին՝ առանց Ուկրաինայի», - ասել է նա։
Ըստ լրատվամիջոցների տեղեկությունների՝ ԱՄՆ-ի առաջարկած ծրագիրը նախատեսում է տարածքային զիջումներ Ուկրաինայի կողմից, ինչպես նաև Ուկրաինայի զինված ուժերի թվաքանակի կրճատում։
Ըստ Financial Times-ի՝ ԱՄՆ-ն ակնկալում է, որ Զելենսկին կստորագրի առաջարկվող ծրագիրը մինչև նոյեմբերի 27-ը: Մինչդեռ, The Wall Street Journal-ը նշել է, որ եվրոպացի առաջնորդները, դժգոհ լինելով ԱՄՆ ծրագրից, պատրաստում են իրենց սեփական հակաառաջարկը:
