Դատախազությունը ստացել է Հովհաննավանքի բռնազավթման վերաբերյալ «Հայաքվեի» ներկայացրած հանցագործության մասին հաղորդումը և օրենքով սահմանված կարգով ընթացք է տրվել։ Այս մասին լրատվամիջոցներին հայտնել են դատախազությունից։
Հիշեցնենք, որ այսօր «Հայաքվե» նախաձեռնությունը Հովհաննավանքի բռնազավթման վերաբերյալ հանցագործության մասին հաղորդում է ներկայացրել դատախազություն՝ պահանջելով քրեական վարույթ նախաձեռնել ՀՀ քրեական օրենսգրի 209 և 441 հոդվածների հատկանիշներով։
«Նիկոլ Փաշինյանը, վերազանցելով իր լիազորությունները և չարաշահելով դրանք, միջամտել է Հայ առաքելական սուրբ եկեղեցու գործունեությանը, ինչը դրսևորվել է պարբերաբար նրա կողմից հնչեցվող կոչերով՝ «վեհարանը գործող Կաթողիկոսից ազատելու», ինչպես նաև՝ դրան հաջորդած կոչերը՝ այցելել Հովհաննավանք և մասնակցել եկեղեցու կողմից չարտոնված պատարագին։
Այդ ծիսակատարության ժամանակ բռնություն է կիրառվել գործադրել եկեղեցու հավատավոր հետևորդների նկատմամբ, քահանաների նկատմամբ, որոնց մուտքն արգելվել է, իրավապահ համակարգն օգտագործվել է՝ քահանաների առևանգման, նրանց մուտքն արգելելու համար։ Այս ամենը համակցությամբ հավասար է՝ Հովհաննավանքը բռնազավթելուն։ Մայր Աթոռը տուժող կողմ է, որովհետև նրան պատկանող վանական համալիրը բռնազավթվել է, օգտագործվել ոչ նպատակային, խաթարվել են հավատացյալների կրոնական իրավունքները»,- նշել է Ավետիք Չալաբյանը:
