Աֆղանստանը և Պակիստանը համաձայնել են շարունակել սահմանային իրավիճակի կարգավորման շուրջ բանակցությունները և նոյեմբերի 6-ին Ստամբուլում նոր հանդիպում անցկացնել։ Այս մասին ասվում է Թուրքիայի և Կատարի միջնորդությամբ անցկացված բանակցություններից հետո Թուրքիայի արտաքին գործերի նախարարության կողմից տարածված համատեղ հայտարարության մեջ։
«Աֆղանստանը, Պակիստանը, Թուրքիան և Կատարը հոկտեմբերի 25-30-ը Ստամբուլում հանդիպումներ են անցկացրել՝ ամրապնդելու Աֆղանստանի և Պակիստանի միջև Դոհայում 2025 թվականի հոկտեմբերի 18-19-ը Թուրքիայի և Կատարի միջնորդությամբ կնքված հրադադարի մասին համաձայնագիրը։
«Բոլոր կողմերը համաձայնել են շարունակել հրադադարը։ Կիրառման հետագա պայմանները կքննարկվեն և կորոշվեն նոյեմբերի 6-ին Ստամբուլում կայանալիք հանդիպման ժամանակ», – ասվում է հայտարարության մեջ։Այն նշում է, որ բոլոր կողմերը համաձայնել են ստեղծել մոնիթորինգի և ստուգման մեխանիզմ, որը կապահովի խաղաղության պահպանումը և խախտողների նկատմամբ պատժամիջոցների կիրառումը։
«Որպես միջնորդներ՝ Թուրքիան և Կատարը երախտագիտություն են հայտնում երկու կողմերի ակտիվ ներդրման համար և պատրաստ են շարունակել համագործակցությունը երկու կողմերի հետ՝ երկարատև խաղաղություն և կայունություն ապահովելու համար», – նշվում է փաստաթղթում։
