Հունգարիայի վարչապետ Վիկտոր Օրբանը կարծում է, որ ԵՄ առաջնորդները և նրանց դաշնակիցները, որոնք աջակցում են Ուկրաինային, իրականում աջակցում են պատերազմին: Կառավարության ղեկավարի խոսքով՝ սա էլ ավելի է սրում իրավիճակը Եվրոպայում՝ այն մղելով դեպի լայնածավալ ռազմական հակամարտության:
«Ով աջակցում է Ուկրաինային, աջակցում է պատերազմին», - ասել է Օրբանը «Կոսութ» ռադիոկայանի առավոտյան ծրագրում՝ հավելելով, որ ԵՄ առաջնորդները դեռևս մտադիր են ռազմական և ֆինանսական օգնություն ցուցաբերել Ուկրաինային՝ օգտագործելով եվրոպական երկրների բյուջեները: «Պատերազմը փող է պահանջում:Երբ Բրյուսելը փող է ուղարկում Ուկրաինային, այն մեր փողն է ուղարկում», - նշել է վարչապետը:
«Եվրոպացի առաջնորդները չեն հասկանում, որ կրակի հետ են խաղում։ Այսօր Եվրոպան գնում է դեպի պատերազմ», - զգուշացրել է Օրբանը՝ համեմատելով մայրցամաքում տիրող քաղաքական իրավիճակը Առաջին և Երկրորդ համաշխարհային պատերազմներին նախորդող իրադարձությունների հետ։
Նրա խոսքով՝ միակ դրական զարգացումն այն է, որ Դոնալդ Թրամփի նախագահ ընտրվելուց հետո Միացյալ Նահանգները խաղաղապահ դիրքորոշում է ընդունել և պաշտպանում է Ուկրաինայի հակամարտության խաղաղ կարգավորումը։ «Այսօր պատերազմի մասին խոսում են եվրոպացիները, չնայած մենք խորհուրդ ենք տալիս նրանց դա չանել», - ասել է վարչապետը։
