Թուրքիայի ֆուտբոլի ֆեդերացիան հայտարարել է, որ խաղադրույք կատարելու մեղադրանքով ընդհանուր 152 մրցավար ուղարկվել է Ֆուտբոլի պրոֆեսիոնալ կարգապահական կոմիտե: Թուրքիայի ֆուտբոլի ֆեդերացիայի նախագահ Իբրահիմ Հաջիոսմանօղլուն հոկտեմբերի 27-ին կայացած մամուլի ասուլիսում հայտարարել էր, որ պրոֆեսիոնալ լիգաներում աշխատող 571 մրցավարներից 371-ն ունեցել է խաղադրույքային հաշիվ, իսկ 152-ը ակտիվորեն խաղադրույք է կատարել: Ակտիվ խաղադրույք կատարած մրցավարներից յոթը բարձր կարգի գլխավոր մրցավարներ են, 15-ը՝ բարձր կարգի գլխավոր մրցավարի օգնականներ, 36-ը՝ կարգային մրցավարներ, իսկ 94-ը՝ կարգային մրցավարի օգնականներ։ Այս մասին գրում է BBC-ն:
Կարգապահական կոմիտե ուղարկված բարձր կարգի յոթ մրցավարների անուններն են՝ Էգեմեն Արթուն, Մեհմեթ Ալի Օզեր, Մելիհ Քուրթ, Մուհամմեդ Սելիմ Օզբեք, Սեյֆեթթին Ալփեր Յըլմազ, Յունուս Դուրսուն և Զորբայ Քյուչյուք: Թուրքիայի ֆուտբոլի ֆեդերացիայում գրանցված է 54 բարձր կարգի մրցավար, և այս յոթի մեջ Զորբայ Քյուչյուքն է միակը, ով այս մրցաշրջանում Սուպերլիգայում հանդիպում է վարել։ 33-ամյա ՖԻՖԱ-ի կրծքանշան ունեցող մրցավար Քյուչյուքը այս մրցաշրջանում մեկական անգամ էլ աշխատել է ՈւԵՖԱ-ի Չեմպիոնների լիգայի 1-ին որակավորման փուլի և ՈւԵՖԱ-ի Կոնֆերենցիաների լիգայի 3-րդ որակավորման փուլի հանդիպումներում։
Այս հետաքննության հետ կապված՝ գործով զբաղվում է նաև Ստամբուլի Հանրապետության դատախազությունը։ Թուրքիայի ֆուտբոլի ֆեդերացիայի հայտարարությունից հետո դատախազությունը տեղեկացրել է, որ 6222 համարի՝ Սպորտում բռնության և անկանոնությունների կանխարգելման մասին օրենքի շրջանակներում հանցագործություն համարվող գործողությունները բացահայտելու համար հետաքննությունը շարունակվում է՝ Թուրքիայի ֆուտբոլի ֆեդերացիայի, Ստամբուլի ոստիկանության դեպարտամենտի և Ֆինանսական հանցագործությունների հետաքննության խորհրդի հետ համագործակցությամբ։ Նշված օրենքի 11-րդ հոդվածը պայմանավորված խաղեր կազմակերպողների համար նախատեսում է մեկից երեք տարի ազատազրկում և մինչև 20 հազար օրվա չափով դրամական տույժ։
Խաղադրույք կատարելու մեղադրանքով կարգապահական կոմիտե ուղարկված 152 մրցավարները կարող են պատժվել Ֆուտբոլի կարգապահական կանոնակարգի 57-րդ հոդվածով։ Այս հոդվածը մրցավարներին, ֆուտբոլիստներին, մարզիչներին և ակումբի աշխատակիցներին արգելում է խաղադրույք կատարել։ Բացահայտված անձինք կարող են պատժվել երեք ամսից մինչև մեկ տարի ժամկետով մրցումներից հեռացմամբ կամ իրավունքների զրկմամբ։ Բացի այդ, ՈւԵՖԱ-ի կարգապահական կանոնակարգը նույնպես արգելում է մրցավարներին խաղադրույք կատարել, իսկ ՖԻՖԱ-ի էթիկայի կանոնների 27-րդ հոդվածի համաձայն՝ նման գործողություններին մասնակցած մրցավարների նկատմամբ կիրառվում է առնվազն 100 հազար շվեյցարական ֆրանկի չափով դրամական տույժ և առավելագույնը երեք տարի ժամկետով ֆուտբոլի հետ կապված ցանկացած գործունեությունից զրկում։
Թուրքիայի ֆուտբոլի ֆեդերացիայի նախագահ Հաջիոսմանօղլուն Ստամբուլում կայացած մամուլի ասուլիսում հայտարարեց, որ իրենք աշխատանք են իրականացրել՝ ընդգրկելով վերջին հինգ տարին, և պատրաստված զեկույցի շրջանակներում մրցավարների խաղադրույքների վերաբերյալ ուշագրավ տեղեկություններ է հրապարակել. հայտարարվել է, որ տասը մրցավար կատարել է ավելի քան 10 հազար խաղադրույք, միայն մեկ մրցավար կատարել է 18 հազար 227 խաղադրույք և 42 մրցավար առանձին-առանձին խաղադրույք է կատարել ավելի քան 1000 ֆուտբոլային հանդիպման վրա: Նշվել է նաև, որ որոշ մրցավարներ միայն մեկ անգամ են խաղադրույք կատարել։ Հաջիոսմանօղլուն ասել է, որ զեկույցը կիսվել է նաև ՈւԵՖԱ-ի և ՖԻՖԱ-ի հետ, և հավելել է. «Թուրքական ֆուտբոլը իրեն արժանի տեղ հասցնելու համար մենք պետք է մաքրենք ամեն մի կեղտ»։
