Ֆրանսիայի նախագահ Էմանուել Մակրոնի համար լավագույն սցենարը կլինի հրաժարական տալը երկրի նոր բյուջեի ընդունումից հետո։ Այս կարծիքը հայտնել է Էդուար Ֆիլիպը, ով Մակրոնի առաջին վարչապետն էր 2017-ից 2020 թվականներին։
«Le Figaro» թերթին տված հարցազրույցում քաղաքական գործիչը նշել է, որ այս տարբերակն ընտրելով՝ Մակրոնը կգործի պետության և ժողովրդավարության շահերից ելնելով, ինչպես նաև կկանխի քաղաքական ճգնաժամի շարունակությունը ևս մեկուկես տարի՝ մինչև նախագահական ընտրությունները, որը կարող է խաթարել երկրի հեղինակությունը։
«Մակրոնը կարող է ընտրել պատշաճ տարբերակ, որը թույլ կտա պահպանել կարգուկանոնը, եթե հայտարարի, որ հրաժարական կտա իրեն հարմար ժամանակ՝ նոր բյուջեի ընդունումից անմիջապես հետո», - ասել է Ֆիլիպը։
Ֆիլիպի խոսքով՝ մեկ այլ տարբերակ կարող է լինել հանրաքվեի կազմակերպումը, որի ժամանակ քվեարկության կդրվի Մակրոնի հրաժարականի հարցը։
