Կատարի վարչապետ և արտաքին գործերի նախարար շեյխ Մոհամմեդ բին Աբդուլ Ռահման ալ Թանին չորեքշաբթի օրը կմեկնի Եգիպտոսի Շարմ էլ Շեյխ քաղաք՝ մասնակցելու Գազայի հատվածում հակամարտության կարգավորման բանակցություններին։
Վարչապետի խորհրդականի և Կատարի արտաքին գործերի նախարարության պաշտոնական խոսնակ Մաջիդ բին Մոհամմեդ ալ-Անսարիի խոսքով՝ խորհրդակցությունները հասել են «վճռական փուլի»։
«Նորին գերազանցություն շեյխ Մոհամմեդ բին Աբդուլ Ռահման ալ Թանին վաղը, չորեքշաբթի առավոտյան, կմեկնի Շարմ էլ Շեյխ՝ մասնակցելու Գազայի հատվածի շուրջ շահագրգիռ կողմերի միջև ընթացող բանակցություններին՝ մշտական հրադադարի հասնելու տարածաշրջանային և միջազգային ջանքերի ակտիվացման ֆոնին», - գրել է նա X-ում։
Դիվանագետը շեշտել է, որ Կատարի վարչապետը կմիանա բանակցային գործընթացին «խորհրդատվությունների վճռորոշ փուլում՝ հաստատելով միջնորդների ցանկությունը՝ հասնել համաձայնության, որը կավարտի Գազայի հատվածում աղետալի պատերազմը»։
