Թբիլիսիի Ռուսթավելի պողոտայում՝ խորհրդարանի շենքի դիմաց, բեռնատար մեքենա է շարժվել ցուցարարների ուղղությամբ, իսկ վարորդը ջրով լի շշեր է նետել ցուցարարների վրա, հաղորդում է TV Pirveli-ն։
Հեռուստաընկերության տվյալներով՝ պարեկային ոստիկանությունը այլևս չի հերթապահում բողոքի ակցիայի վայրի մոտակայքում։ Ոստիկանական խմբերը սովորաբար տեղակայվում էին ցուցարարների կողմից փակված ճանապարհի հատվածի սկզբում և վերջում։
Հեռուստաընկերությունը հաղորդում է, որ պարեկային ոստիկանության բացակայության պատճառով բեռնատարը մխրճվել է բողոքի ցույցի մասնակիցների մեջ։ Վարորդը ագրեսիվ է եղել ցուցարարների նկատմամբ, նրանց վրա ջրի շշեր է նետել։
Թբիլիսիի կենտրոնում գտնվող խորհրդարանի շենքի առջև ավանդաբար հավաքվել են մի քանի տասնյակ ցուցարարներ։ Չնայած ցուցարարների թիվը փոքր է, այնուամենայնիվ նրանք դեռևս փակում են պողոտայի մի մասը։ Պողոտայում ամենօրյա բողոքի ցույցեր են տեղի ունենում մոտ մեկ տարի։ Սկզբում հանրահավաքները մեծ էին, բայց վերջերս ցուցարարների թիվը նվազում է։ Նախորդ օրը Վրաստանի վարչապետ Իրակլի Կոբախիձեն հայտարարել էր, որ Թբիլիսիում Ռուսթավելի պողոտան խորհրդարանի առջև փակողները «կկրեն այս բռնության պատասխանատվությունը»։
