NASA-ի «Ջունո» տիեզերանավը, որը մոտ տասը տարի պտտվում էր Յուպիտերի շուրջ և պատմական տվյալներ էր փոխանցում հսկա մոլորակի մասին, հնարավոր է՝ արդեն դադարեցրել է աշխատանքը։ Սակայն հաստատ տեղեկություն այս մասին չկա։
«Ջունո»-ն արձակվել էր 2011 թվականին և Յուպիտերի ուղեծիր մտել 2016-ին՝ նախատեսված լինելով ընդամենը 20 ամիս աշխատելու համար։ Սակայն այն շարունակել էր գործել գրեթե տասը տարի՝ գիտնականներին փոխանցելով բացառիկ տվյալներ Յուպիտերի մթնոլորտի, մագնիսական դաշտի, օղակների և նրա խոշոր արբանյակների՝ Գանիմեդի, Եվրոպայի և Իոյի մասին։
NASA-ն մի քանի անգամ երկարաձգել էր առաքելությունը։ Այդ ժամկետն արդեն անցել է, սակայն ԱՄՆ կառավարության ֆինանսավորման դադարեցման պատճառով գործակալությունը չի կարող հայտարարել առաքելության ընթացիկ կարգավիճակի մասին։
Եթե առաքելությունը իսկապես ավարտվել է, դա մի քանի տարվա բաց կթողնի գիտական ուսումնասիրությունների մեջ, մինչև հաջորդ խոշոր առաքելության՝ Europa Clipper-ի ժամանումը։ «Եվրոպա Կլիպպեր»-ը մեկնարկել է 2024 թվականի հոկտեմբերին և Յուպիտերին կհասնի 2030-ին՝ Եվրոպա արբանյակը մանրամասն ուսումնասիրելու նպատակով։
