ՀՀ երկրորդ նախագահ Ռոբերտ Քոչարյանի որդին՝ Սեդրակ Քոչարյանը, պետության դեմ հայց է ներկայացրել։ Նա պահանջում է ճանաչել իր անմեղության կանխավարկածի խախտումը և պետությունից ստանալ 2 միլիոն դրամի չափով ոչ նյութական վնասի փոխհատուցում։
Euromedia 24-ի հետ զրույցում Սեդրակ Քոչարյանի ներկայացուցիչ, փաստաբան Հայկ Ալումյանը նշեց, որ դատարան են դիմել ոչ այնքան տարածված հիմքով, քանի որ պրակտիկայում անմեղության կանխավարկածի խախտման դեպքերով հայցեր քիչ են ներկայացվում։ Հայցը վերաբերում է հրապարակային զրպարտությանը և պատվի ու արժանապատվության պաշտպանությանը։ Բացի այդ, դատարանից պահանջվում է նաև 2 միլիոն դրամի փոխհատուցում։
Նշենք, որ դեռևս 2020 թվականին Ռոբերտ Քոչարյանն էլ էր դատի տվել Նիկոլ Փաշինյանին՝ զրպարտության հիմքով, պահանջելով պաշտպանել իր պատիվն ու արժանապատվությունը և փոխհատուցել ոչ նյութական վնասը 2 միլիոն դրամի չափով։
Ալումյանի խոսքով՝ հայցի պատճառը վարչապետի և դատախազության ներկայացուցիչների չհավասարակշռված և անմեղության կանխավարկածը խախտող հայտարարություններն են։
«Սահմանադրությամբ երաշխավորված ցանկացած իրավունք խախտվելու դեպքում տվյալ անձը իրավունք ունի դիմել դատարան և պահանջել խախտման ճանաչում, ինչպես նաև նյութական և ոչ նյութական վնասների փոխհատուցում։ Քաղաքացիական օրենսգիրքն էլ դա նախատեսում է», – ասաց նա։
Ինչ վերաբերում է պահանջվող փոխհատուցման չափին, փաստաբանը պարզաբանեց․
«Ընտրվել է հենց 2 միլիոն դրամը, քանի որ խախտումն արտահայտվել է ամենաակնհայտ ձևով։ Այն հնչեցվել է մեծ ծածկույթ ունեցող հեռուստաընկերության եթերում, արվել է դատախազության կողմից և ներկայացվել որպես հաստատված փաստ։ Այդ ամենը, հաշվի առնելով մեղադրանքի ծանրությունը, առավել մեծ վնաս է հասցրել»։
Ալումյանի կարծիքով՝ նման հրապարակային հայտարարությունները ազդում են ոչ միայն Սեդրակ Քոչարյանի, այլև ընդհանրապես մեղադրյալների նկատմամբ հասարակական վերաբերմունքի ձևավորման վրա։
«Եթե որևէ մեկը պնդի, թե դա չի ազդում հասարակական կարծիքի վրա, ապա ստացվում է, որ դատախազությունն ու քննչական մարմինները լիովին հեղինակազրկված են։ Իրականում նրանց խոսքերը դեռևս ազդեցություն ունեն։ Սա խնդրի միայն մի կողմն է։ Մյուս կողմը՝ դատարանի վրա անուղղակի ճնշումն է։ Երբ գործը քննող դատարանի առջև արդեն իսկ որպես փաստ ներկայացվում է մեղադրանքը, դա կարող է որոշակի ազդեցություն ունենալ դատական համակարգի վրա», – նշեց նա։
Հիշեցնենք, Սեդրակ Քոչարյանին մեղադրանք է առաջադրվել այն բանի համար, որ հանդիսանալով «ԼԼ Բիմբո» ՍՊԸ-ի համահիմնադիր և հնարավորություն ունենալով կանխորոշելու դրա գործադիր տնօրենի որոշումները՝ օժանդակել է իր հետ փոխկապակցված անձ Սերժ Սարգսյանին։
Ըստ մեղադրանքի՝ նա խոչընդոտները վերացնելու և միջոցներ տրամադրելու եղանակով աջակցել է Սարգսյանին ձեռնարկատիրական գործունեությանը մասնակցելուն և առանձնապես խոշոր չափերով կաշառք ստանալուն։
Քոչարյանը, սակայն, ի սկզբանե պնդել է, որ իրեն առաջադրված գործողությունները չի կատարել։ Նրա գործը ներկայում գտնվում է դատարանում։
