Ամերիկացի վիրաբույժ-ատամնաբույժը պնդում է, որ Թուրինյան սավանի վրա նկատելի են ստորին ատամների ուրվագծեր, ինչը կարող է վկայել Քրիստոսի Հարության պահին տեղի ունեցած էներգիայի հզոր պայթյունի մասին։
ԱՄՆ-ից վիրաբույժ-ատամնաբույժ դոկտոր Ջոն Սոտոսանտին, ով նախկինում հաջող գործունեություն է ծավալել բժշկության ոլորտում, իսկ այժմ նվիրվել է աստվածաբանական հետազոտություններին, սենսացիոն բացահայտում է արել Իտալիայում Թուրինյան սավանի ցուցահանդես այցելության ժամանակ, հաղորդում է Daily Mail-ը։
Կանգնելով հնագույն վուշե կտավի առջև, որով, ըստ քրիստոնեական ավանդության, խաչելությունից հետո փաթաթել են Հիսուսի մարմինը, նա նկատել է մարդկային ատամների հազիվ տեսանելի ուրվագծեր։
Իր նոր ուսումնասիրության մեջ, որը դեռևս գիտական գրախոսություն չի անցել, Սոտոսանտին նշում է, որ կարողացել է զանազանել ստորին ծնոտի կտրիչները։ Սա, ըստ նրա, նշան է այն բանի, որ մահից հետո ծնոտի մկանները թուլացել են՝ ատամները տեսանելի դարձնելով։
«Մահից անմիջապես հետո մարմնի, այդ թվում՝ ծնոտի մկանները թուլանում են։ Դա կարող է հանգեցնել ծնոտի կախ ընկնելուն, ինչի հետևանքով ատամները տեսանելի են դառնում», – պարզաբանել է նա։
Սակայն նրա ամենաաղմկահարույց պնդումը հետևյալն է․ Սոտոսանտին կարծում է, որ ատամների պատկերն առաջացել է Հարության պահին ազատված ճառագայթային էներգիայի հզոր պայթյունի հետևանքով։
«Եթե ատամներն իսկապես երևում են, դա հաստատում է Հարության ժամանակ տեղի ունեցած էներգիայի պայթյունի մասին տեսությունը, որը և դրոշմվել է կտավի վրա», – հայտարարել է հետազոտողը։
