Դանիացի գիտնականները կասկածի տակ են դրել «նորմալ քաշի» վերաբերյալ տարածված կարծիքը։ Վիեննայում Շաքարային դիաբետի ուսումնասիրության եվրոպական ասոցիացիայի (EASD) տարեկան հանդիպմանը ներկայացված նոր ուսումնասիրությունը ցույց է տվել, որ մարմնի զանգվածի ինդեքս (BMI) ավելցուկային քաշի (25–30 կգ/մ²) և նույնիսկ չափավոր ճարպակալման (30–35 կգ/մ²) սահմաններում գտնվող մարդիկ հինգ տարվա հետազոտության ընթացքում մահանալու ավելի մեծ հավանականություն չունեին, քան նրանք, որոնց քաշը համարվում էր «առողջ» (22.5–25 կգ/մ²)։
Ավելին, նորմայի ստորին և միջին սահմաններում գտնվող BMI (18.5–22.5 կգ/մ²) գտնվող մարդիկ մահվան ավելի բարձր ռիսկ ունեին։ Օրինակ՝ 18.5–20 BMI-ի դեպքում մահվան հավանականությունը երկու անգամ ավելի բարձր էր, քան համեմատական խմբում, իսկ 20–22.5 BMI-ի դեպքում՝ 27%-ով ավելի բարձր։ Հետազոտողները այս արդյունքները բացատրում են նրանով, որ որոշ մասնակիցների մոտ քաշի կորուստը կարող է կապված լինել հիվանդության, այլ ոչ թե լավ առողջության հետ։
«Գիրությունն ու թերքաշը գլոբալ լուրջ մարտահրավերներ են։ Սակայն մենք տեսանք, որ մահացությունն աճում է ոչ միայն ծանր ճարպակալման կամ թերքաշության դեպքում, այլև նորմալ, բայց ցածր մարմնի զանգվածի ինդեքս ունեցող մարդկանց մոտ», - ասաց ուսումնասիրության ղեկավար Սիգրիդ Բյորգե Գրիբշոլտը Օրհուսի համալսարանի Սթեն շաքարախտի կենտրոնից։
Ծանր ճարպակալումը (40-ից բարձր մարմնի զանգվածի ինդեքս) իսկապես ավելի քան կրկնապատկեց մահվան ռիսկը, և 35-40 կգ/մ² դեպքում ռիսկը մեծացավ 23%-ով։ Սակայն ընդհանուր առմամբ, տվյալները ցույց տվեցին, որ չափավոր ավելորդ քաշը պարտադիր չէ, որ կապված լինի կյանքի ավելի կարճ տևողության հետ։
«Ոչ թե մարմնի զանգվածի ինդեքսն է խաղում գլխավոր դերը, այլ ճարպի բաշխումը մարմնում։ Որովայնի խոռոչում գտնվող ներքին օրգանների ճարպը նյութափոխանակորեն ակտիվ է և մեծացնում է շաքարախտի և սրտանոթային հիվանդությունների ռիսկը։ Մինչդեռ ազդրերի կամ հետույքի վրա ճարպային կուտակումները կարող են համեմատաբար անվտանգ լինել», - բացատրեց ուսումնասիրության համահեղինակ, պրոֆեսոր Յենս Մելդգաարդ Բրունը։
Հեղինակները ընդգծում են, որ ճարպակալումը պետք է բուժվի անհատականացված եղանակով՝ հաշվի առնելով ոչ միայն մարմնի զանգվածի ինդեքսը, այլև ճարպային հյուսվածքի տեղակայումը, ինչպես նաև ուղեկցող հիվանդությունները։
Թարգմանությունը՝ Euromedia24.com-ի
