Ռուսաստանը ցանկանում է Թուրքիայից հետ գնել 2019 թվականին Անկարային մատակարարված Ս-400 զենիթահրթիռային համալիրները և վերավաճառել դրանք այլ երկրի, գրում է թուրքական Nefes պարբերականը։
Ինչպես պնդում է ԶԼՄ-ն, պատճառն այն է, որ Մոսկվան պահեստում չունի առաքման համար պատրաստ համակարգեր. բոլոր առկա համակարգերն օգտագործվում են հենց Ռուսաստանի կողմից։
Մինչդեռ ռուսական Ս-400 համակարգերի նկատմամբ Թուրքիայի կարիքը տարեցտարի նվազում է։ Երկրում զարգանում է հակաօդային պաշտպանության սեփական ազգային համակարգը՝ «Çelik Kubbe» («Պողպատե գմբեթ»)։ Բացի այդ, Ս-400-ները հնարավոր չէ ինտեգրել ՆԱՏՕ-ի կառուցվածքում, իսկ համալիրի հրթիռներն արդեն սպառել են պահպանման ժամկետի կեսը և սպասարկման կարիք ունեն։
Ի սկզբանե Թուրքիան Ռուսաստանից 2,5 միլիարդ դոլարով ձեռք էր բերել Ս-400-ի երկու դիվիզիոն (համաձայնագիրը ստորագրվել է 2017 թվականին, մատակարարումները սկսվել են 2019-ին)։ Սակայն գնումն առաջացրել է ԱՄՆ-ի կոշտ արձագանքը. CAATSA օրենքի շրջանակներում Անկարայի նկատմամբ պատժամիջոցներ են կիրառվել, իսկ Թուրքիան հեռացվել է F-35 հինգերորդ սերնդի կործանիչների ծրագրից։
Այսօր, երբ Թուրքիան բանակցություններ է վարում F-16 կործանիչների գնման և արդիականացման, ինչպես նաև F-35 նախագծին վերադառնալու հույս ունի, Անկարան կարող է դիտարկել ռուսական համակարգերը վերադարձնելու տարբերակը։
