Միացյալ Նահանգները «ուշադիր հետևում է» Կարմիր ծովի հատակով անցնող ստորջրյա օպտիկամանրաթելային մալուխների վնասումից հետո ստեղծված իրավիճակին, էմիրաթական The National թերթին ասել է Պետդեպարտամենտի խոսնակը։
Պաշտոնյան հավելել է, որ Վաշինգտոնը լավ գիտակցում է ստորջրյա մալուխների կարևոր նշանակությունը առևտրի, հաղորդակցության և անվտանգության համար ամբողջ աշխարհում։
Ինչպես նշում է The National-ը, սեպտեմբերի 7-ին և 8-ին Կարմիր ծովում մալուխների վնասմանը հաջորդած ինտերնետային խափանումները մասամբ վերացվել են: Այնուամենայնիվ, Մերձավոր Արևելքի որոշ մասերում ինտերնետի արագությունը կարող է չափազանց ցածր մնալ ևս վեց շաբաթ՝ ստորջրյա կապի վերականգնման դժվարությունների պատճառով:
Հրատարակությունը պնդում է, որ Կարմիր ծովում ստորջրյա մալուխների դեմ հնարավոր դիվերսիան կարող էր իրականացվել «Անսար Ալլահ» շարժման հութի ապստամբների կողմից։
