ԵՄ պաշտոնյաները սեպտեմբերի 8-ին Վաշինգտոնում բանակցություններ կանցկացնեն հակառուսական սահմանափակումների վերաբերյալ, հաղորդում է Associated Press-ը՝ հղում անելով աղբյուրներին։
Նրանց տեղեկությունների համաձայն՝ պատվիրակությունը կգլխավորի ԵՄ պատժամիջոցների հարցերով հատուկ ներկայացուցիչ Դեյվիդ Օ'Սալիվանը։ Հանդիպումը տեղի կունենա ԱՄՆ ֆինանսների նախարարությունում, որտեղ նրանք կքննարկեն Ռուսաստանի վրա տնտեսական ճնշման գործիքները, այդ թվում՝ նոր պատժամիջոցները։
Քննարկմանը կմասնակցեն Պետդեպարտամենտի, ԱՄՆ առևտրային ներկայացուցչի գրասենյակի և Սպիտակ տան պաշտոնյաներ։
Ավելի վաղ Եվրոպական խորհրդի ղեկավար Անտոնիո Կոստան հայտարարել էր ԵՄ թիմի՝ Ռուսաստանի դեմ պատժամիջոցները քննարկելու ԱՄՆ մեկնելու ծրագրերի մասին։ Նա չի նշել, թե կոնկրետ երբ է տեղի ունենալու հանդիպումը։
Ռուսաստանի նախագահ Վլադիմիր Պուտինը Չինաստան կատարած այցից հետո տեղի ունեցած մամուլի ասուլիսում հայտարարել է, որ Արևմուտքն օգտագործում է Ուկրաինայի իրադարձությունները տարբեր երկրների հետ հարաբերություններում իր տնտեսական խնդիրները լուծելու համար։
