ԱՄՆ նախագահ Դոնալդ Թրամփը որևէ հստակ պարտավորություն չի ստանձնել Ռուսաստանի դեմ նոր պատժամիջոցներ սահմանելու վերաբերյալ՝ չնայած եվրոպացի առաջնորդների հետ ձեռք բերված պայմանավորվածություններին, հաղորդում է The Wall Street Journal-ը՝ հղում անելով հինգշաբթի օրը Փարիզում «կամավորների կոալիցիայի» հանդիպումներին մասնակցած պաշտոնյաներին։
Ինչպես նշվում է հրապարակման մեջ, այս տեղեկատվությունը տարածվել է եվրոպական երկրների ներկայացուցիչների հայտարարությունների ֆոնին, որ ամերիկացի առաջնորդը համաձայնել է ԱՄՆ-ի և Եվրոպայի միջև համատեղ տեխնիկական աշխատանքի՝ Ռուսաստանի դեմ լրացուցիչ պատժամիջոցների, այդ թվում՝ Չինաստանի և այլ երկրների դեմ երկրորդական սահմանափակումների վերաբերյալ։
Սեպտեմբերի 4-ին Փարիզում տեղի ունեցավ «կամավորների կոալիցիայի» հանդիպումը, որտեղ, ի թիվս այլ հարցերի, քննարկվեցին Ուկրաինայի անվտանգության երաշխիքները: Ինչպես ավելի վաղ հայտարարել էր Ֆրանսիայի նախագահ Էմանուել Մակրոնը, կոալիցիան ունի մոտ 30 մասնակից, որոնցից մի քանիսը մասնակցել են քննարկումներին տեսակապի միջոցով:
