«Ես հավատում եմ, որ Հարավային Կովկասը վերջապես կգտնի երկար սպասված խաղաղությունը։ Ես դա տեսա իմ ընկերոջ՝ պարոն Իլհամ Ալիևի հետ երկկողմ հանդիպման ժամանակ»։
Ինչպես հաղորդում է APA-ն, այս մասին հայտարարել է Թուրքիայի նախագահ Ռեջեփ Թայիփ Էրդողանը։ Էրդողանը նշել է, որ Վաշինգտոնի համաձայնագիրը արագացրել է Հայաստանի և Ադրբեջանի միջև հարաբերությունների կարգավորումը. «Ադրբեջանն ու Հայաստանը մեծապես հաղթահարել են խաղաղության ճանապարհին առկա խոչընդոտները և հասել են վերջնական փուլին: Ես բովանդակալից հանդիպումներ եմ ունեցել Ադրբեջանի նախագահ Իլհամ Ալիևի, իսկ ավելի ուշ՝ Հայաստանի վարչապետ Նիկոլ Փաշինյանի հետ:
Երկու հանդիպումներում էլ տեսա, որ Ալիևն ու Փաշինյանը նմանատիպ դիրքորոշումներ ունեն: Նրանք նույն ուղղությամբ են նայում»: Էրդողանը նաև հայտարարել է, որ Զանգեզուրի միջանցքի հարցի վերաբերյալ որևէ խնդիր կամ տարաձայնություն չկա։ Նա նշել է, թե տարածաշրջանում կվերականգնվեն ճանապարհներն ու երկաթուղիները, կբացվեն սահմանային անցակետերը, և շատ ոլորտներ, մասնավորապես՝ առևտուրը, կշահեն։
«Ռուսաստանն ու Իրանը նույնպես ժամանակի ընթացքում կհասկանան, որ իրենց մտավախություններն անհիմն են», - ընդգծել է Թուրքիայի առաջնորդը։
