Հյուսիսային Կորեայի առաջնորդ Կիմ Չեն Ընը գնացքով մեկնել է Փհենյանից և ուղևորվել Չինաստան՝ մասնակցելու Երկրորդ համաշխարհային պատերազմի ավարտի 80-ամյակի տոնակատարություններին, հաղորդում է հարավկորեական Yonhap լրատվական գործակալությունը՝ հղում անելով ԿԺԴՀ-ի իր աղբյուրներին։
Նրա խոսքով՝ պետական գործերի նախագահը մայրաքաղաքից մեկնել է տեղական ժամանակով կեսօրից հետո: Այժմ նա ճանապարհին է: Հարավային Կորեան նշում է, որ Կիմ Չեն Ընը առաջին անգամ կմասնակցի բազմակողմ դիվանագիտական միջոցառման:
Չինաստանը պատրաստվում է հանդիսավոր կերպով նշել հաղթանակի 80-ամյակը։ Սեպտեմբերի 3-ին Պեկինում կանցկացվի լայնածավալ շքերթ, որտեղ ՉԺՀ-ն կներկայացնի ազգային արտադրության ռազմական տեխնիկա, որը ծառայության մեջ է երկրի բանակում։
