Ատոմային էներգիայի միջազգային գործակալության (ԱԷՄԳ) ներկայացուցիչները շուտով կարող են Իրանի իշխանություններից թույլտվություն ստանալ այցելելու և ստուգայց կատարելու Իսլամական Հանրապետության հարավում գտնվող Բուշերի ատոմակայանը, որը կառուցվել է ռուս մասնագետների կողմից, որտեղ ԱԷՄԳ-ի տեսուչների ներկայությամբ պետք է փոխարինվի միջուկային վառելիքը։
Այս մասին հայտնել է The Wall Street Journal (WSJ)-ի թղթակից Լոուրենս Նորմանը։
«Այս պահին, կարծես թե, ԱԷՄԳ-ն մոտ է միայն իսրայելական և ամերիկյան հարվածների հետևանքով չվնասված միջուկային օբյեկտներ այցելելու թույլտվություն ստանալուն», ինչպիսիք են Բուշերը և Թեհրանի հետազոտական ռեակտորը, հարստացման օբյեկտները ստուգելու, պաշարների հետ կապված իրավիճակը գնահատելու կամ այլ օբյեկտներում կատարվողը ստուգելու փոխարեն», - գրել է լրագրողը X-ում։
Նրա խոսքով՝ չնայած ԱԷՄԳ գլխավոր տնօրեն Ռաֆայել Գրոսիի օգոստոսի 26-ի հայտարարությանը, որ տեսուչների առաջին խումբը վերադարձել է Իրան և պատրաստվում է վերսկսել աշխատանքը Իսլամական Հանրապետության միջուկային օբյեկտներում, նրանք այն չեն վերսկսել։
