Պակիստանի իշխանությունները տարհանել են առնվազն 150,000 բնակչի հնարավոր ջրհեղեղի գոտուց, այն բանից հետո, երբ Հնդկաստանը հայտարարել է աղետի մասին նախազգուշացում, հաղորդում է Reuters-ը։
Բնակչության տարհանումը տեղի է ունեցել երկրի ամենախիտ բնակեցված արևելյան Փանջաբ նահանգում՝ մուսսոնային անձրևների հետևանքով Հնդկաստանով և Պակիստանով հոսող Ռավի, Սուտլեջ և Չենաբ գետերի մակարդակի բարձրացման պատճառով։
Նյու Դելիի ջրհեղեղի մասին նախազգուշացումը քննադատության է արժանացել Պակիստանի արտաքին գործերի նախարարության կողմից:
«Հնդկաստանը ջրհեղեղի մասին նախազգուշացումը հրապարակել է դիվանագիտական ուղիներով, այլ ոչ թե Ինդոսի ջրային հանձնաժողովի միջոցով, ինչպես պահանջվում է Ինդոսի ջրերի մասին պայմանագրով», - ասել է արտաքին գործերի նախարարության խոսնակ Շաֆկատ Ալի Խանը:
«Մենք շարունակում ենք պնդել, որ Հնդկաստանը պարտավոր է լիովին պահպանել պայմանագրի բոլոր դրույթները»։ Հնդկաստանի կողմից պայմանագրի գործողությունը կասեցնելու միակողմանի հայտարարությունը «միջազգային իրավունքի լուրջ խախտում է և կարող է լուրջ բացասական հետևանքներ ունենալ Հարավային Ասիայի խաղաղության և կայունության համար», - ընդգծել է դիվանագետը։
