Թուրքիան Սիրիային օգնություն կցուցաբերի կառավարական բանակի համար անձնակազմի պատրաստման, ռազմական տեխնիկայի և զենքի համակարգերի մատակարարման հարցում՝ երկու երկրների պաշտպանության նախարարությունների միջև կնքված հուշագրի շրջանակներում։
Այս մասին հայտնել են թուրքական ռազմական գերատեսչության աղբյուրները՝ մեկնաբանելով չորեքշաբթի օրը Անկարայում Թուրքիայի պաշտպանության նախարար Յաշար Գյուլերի և Սիրիայի անցումային կառավարության պաշտպանության նախարարության ղեկավար Մուրհաֆ Աբու Կասրայի կողմից ստորագրված փաստաթուղթը։
«Ստորագրված հուշագիրը նպատակ ունի համակարգել և պլանավորել ռազմական վարժանքներն ու համագործակցությունը, խորհրդակցությունները, տեղեկատվության և փորձի փոխանակումը, ապահովել ռազմական տեխնիկայի, զենքի համակարգերի և լոգիստիկայի մատակարարումը՝ համաձայն Սիրիայի պաշտպանական կարիքների», - հաղորդել է TRT Haber-ը՝ հղում անելով աղբյուրներին։
«Թուրքիան կշարունակի օգնել Սիրիային ահաբեկչության դեմ պայքարում և նրա պաշտպանական ու անվտանգության կարողությունների ամրապնդման գործում», - ասել են աղբյուրները։
