ԱՄՆ նախագահ Դոնալդ Թրամփը պարզապես «կերավ» Եվրահանձնաժողովի ղեկավար Ուրսուլա ֆոն դեր Լայենին Շոտլանդիայում բանակցությունների ժամանակ, իսկ Եվրամիությունը ամերիկացիների հետ կնքեց անբարենպաստ գործարք մաքսատուրքերի վերաբերյալ։ Այս կարծիքը հայտնել է Հունգարիայի վարչապետ Վիկտոր Օրբանը՝ մեկնաբանելով ԱՄՆ-Եվրոպա հանդիպման արդյունքները։
«Թրամփը նախաճաշին կերավ Ուրսուլային», - ասել է կառավարության ղեկավարը՝ հավելելով, որ դա սպասելի էր։
«ԱՄՆ նախագահը ծանրքաշային բանակցող է, մինչդեռ Եվրահանձնաժողովի նախագահը թեթև քաշային կարգի է», - բացատրել է Օրբանը հունգարացի հայտնի հեռուստահաղորդավար Բալաժ Նեմեթի YouTube ալիքի հաղորդման ժամանակ։
Օրբանը նշել է, որ կիրակի օրը Շոտլանդիայում կայացած բանակցություններում ամերիկյան դիրքորոշումը շատ ավելի ուժեղ էր, քան եվրոպականը։ Արդյունքում, այնտեղ ձեռք բերված համաձայնությունն ավելի շահավետ էր ԱՄՆ-ի, քան ԵՄ-ի համար։ «Մեծ Բրիտանիան վերջերս կարողացավ ավելի լավ համաձայնագիր կնքել ամերիկացիների հետ», - ասել է վարչապետը։
