Եկեղեցի–իշխանություն լարվածության ֆոնին Անուշավան եպիսկոպոս Ժամկոչյանի շուրջ ծավալված իրադարձությունները մեծ ուշադրություն են գրավել։ Նա պաշտոնանկ արվեց, սակայն ավելի ուշ տեղեկություն ստացվեց, որ առաջիկայում նոր պաշտոն կստանա և կշարունակի դասավանդել։ Այս ամենը բազմաթիվ հարցեր է առաջացրել իշխանություն–եկեղեցի լարված հարաբերությունների համատեքստում։
ԵՊՀ-ից պաշտոնական պատճառաբանությունն այն էր, որ եպիսկոպոս Ժամկոչյանի պայմանագրի ժամկետն ավարտվել է։ Այս բացատրությունը, սակայն, որոշ հարցեր է առաջացնում։ Ֆակուլտետում ոչ ոք տեղյակ չէր, որ դեկանի պաշտոնավարման ժամկետը մոտենում է ավարտին կամ որ ընտրություններ են սպասվում։
Սա ցույց է տալիս, որ որոշումը անսպասելի է եղել։ Եպիսկոպոս Ժամկոչյանը դեկան էր շուրջ 20 տարի, մինչդեռ համալսարանի կանոններով դեկանը կարող է պաշտոնավարել միայն հինգ տարի, և նույն անձը չի կարող անընդմեջ երկու անգամից ավելի վերընտրվել։
Այս պաշտոնանկությունը քննարկվում է նաև եպիսկոպոսի՝ Սամվել Կարապետյանին աջակցող հավաքին մասնակցության համատեքստում։ Սա տեղի ունեցավ իշխանության և Եկեղեցու միջև լարվածության ֆոնին։ Պաշտոնից ազատվելուց հետո հայտնի դարձավ, որ Անուշավան եպիսկոպոս Ժամկոչյանը առաջիկայում կստանա նոր պաշտոն՝ Հայագիտական կենտրոնի տնօրեն, և կշարունակի դասավանդել Աստվածաբանության ֆակուլտետում,այն պարագայում,որ մամուլում հրապարակումներ եղան, որ Անուշավան սրբազանը, իբրև հետապնդվում է իշխանությունների կողմից և Աստվածաբանության ֆակուլտետից իրեն հեռացրել են այդ համատեքստում է։
Այս պարագայում զարմանք է առաջացնում, որ եթե տվյալ եպիսկոպոսը ենթարկվում է հալածանքների իշխանությունների կողմից, ապա ինչպե՞ս ստացվեց, որ շատ արագ նոր պաշտոն ստացավ նույն ԵՊՀ-ում։ Կապ հաստատեցինք ԵՊՀ-ի մամուլի բաժնի հետ՝ տեղեկությունը հաստատելու համար, սակայն խուսափեցին որևէ հստակ պատասխան տալ։
Ի դեպ, ԵՊՀ ռեկտորի դերակատարումը նույնպես կարևոր է եղել Ժամկոչյանի նոր պաշտոնի նշանակելու հարցում, քանի որ եպիսկոպոս Ժամկոչյանը և ԵՊՀ ռեկտորը համահեղինակությամբ գիտական աշխատանքի հեղինակներ են և ըստ տեղեկությունների՝ ընկերներ։ Կարևոր է նշել, որ եպիսկոպոսը հերքել է նաև այն լուրերը, թե ինքը և ԵՊՀ ռեկտոր Հովհաննես Հովհաննիսյանը վարչապետին խորհրդատվություն են տրամադրում եկեղեցական թեմաների հարցերով՝ դրանք անվանելով «դատապարտելի կեղծիք»։
Անուշավան եպիսկոպոս Ժամկոչյանը իր հարցազրույցում նշել էր, որ չի կիսում Նիկոլ Փաշինյանի գնահատականները հոգևորականների վերաբերյալ, որ հոգևորականության կուսակրոնությունը և Կաթողիկոսի ընտրությունը բացառապես Եկեղեցու ներքին հարցերն են, իսկ Մայր Աթոռը «ամեն ինչից վեր կառույց է»։ Նշենք, որ Եկեղեցին Անուշավան եպիսկոպոս Ժամկոչյանի պաշտոնանկությանը դեռևս ոչ մի արձագանք չի տվել և սա չի որակել Եկեղեցու դեմ արշավի մի մաս։
Մանե Գևորգյան
