ՀՅԴ Հայաստանի Երիտասարդական Միությունը դատապարտում է այն փորձերը, որոնց նպատակն է վախեցնել, լռեցնել ու ահաբեկել քաղաքականապես գիտակից, գաղափարական համոզմունքներով առաջնորդվող հայ երիտասարդներին։
Հիշեցնենք, որ 18-ամյա Անդրանիկ Չամիչյանին 2 ամսով կալանավորել է «Սթրայքբոլ» խաղի սիրահար լինելու համար, «նունը դրել են ահաբեկչության նախապատրաստություն»։
«ԱՆԴՐԱՆԻԿԻՑ ՎԱԽԵՆՈՒՄ ԵՆ
Վերջին օրերին մենք ականատեսն ենք լինում Դաշնակցության և ՀՅԴ Հայաստանի Երիտասարդական Միության նկատմամբ ուղղված զրպարտչական, վարկաբեկման և մանիպուլյատիվ արշավի, որը ոչ թե հիմնված է իրականության վրա, այլ՝ թելադրված է քաղաքական իշխանության կողմից։
Երիտասարդական Միության անունից խստորեն դատապարտում ենք այն փորձերը, որոնց նպատակն է վախեցնել, լռեցնել ու ահաբեկել քաղաքականապես գիտակից, գաղափարական համոզմունքներով առաջնորդվող հայ երիտասարդներին։
Մեր ընկերների նկատմամբ իրականացվող գործողությունները՝ անօրինական ձերբակալություններ, խուզարկություններ, կեղծ մեղադրանքներ, հիշեցնում են խորհրդային ռեպրեսիվ ավանդույթները։
Երիտասարդներին ձերբակալել խաղային զենքերի, օրենքի սահմաններում ազատ վաճառքի դրված խաղային այլ իրերի ձեռքբերման համար՝ ոչ այլ ինչ է, քան ծաղրի առարկա դարձնել ուժային և հատուկ ծառայություններին։
Հրապարակել 135-ամյա կուսակցության՝ գրեթե նույն տարիքի կարգախոսով շապիկ և պարծենալ «բացահայտված ահաբեկչական գործողություններով» ՝ ոչ այլ ինչ է, քան ազգային ամոթ։
Պետական ապարատը՝ դատախազություն, քննչական մարմիններ, հատուկ ծառայություններ, այս օրերին զբաղված են ոչ թե Հայաստանի գլխին կախված նոր պատերզմի, սպառնալիքների կանխարգելմամբ, հասարակության, սահմանների պաշտպանության առավել ամրացմամբ՝ այլ սթրայքբոլի սիրահարների «բացահայտման և վնասազրծման» լուրջ ու պատասխանատու աշխատանքով։
Մենք հպարտ ենք մեր ընկերներով, ովքեր պատվի ու սկզբունքի հարց են համարում պայքարը հանուն հայրենիքի, և ոչ մի կարծրատիպ, սպառնալիք կամ զրպարտություն չի կոտրի այդ կամքը։
ՀՅԴ երիտասարդությունը շարունակում է իր գաղափարական, քաղաքական ու կրթական պայքարը՝ պատասխանատվությամբ, ազնվությամբ ու համարձակությամբ։ Իսկ այս շինծու գործընթացները ոչ թե կվախեցնեն, այլ նոր համոզմունք ու իմաստ կտան մեր պայքարին և կապահովեն մեր գաղափարական ընկերների և համակրների համախմբումը»,- նշված է ՀՅԴ Հայաստանի Երիտասարդական միության հայտարարության մեջ։
