Հայաստանը և Ռուսաստանը մնում են ռազմավարական դաշնակիցներ, երկկողմ հարաբերություններում շարունակում է գործել վերջին մի քանի տասնամյակներին ընդունված փաստաթղթերի ողջ փաթեթը: Այս մասին Euromedia24-ին տված հարցազրույցում հայտարարել է Հայաստանում Ռուսաստանի Դաշնության արտակարգ և լիազոր դեսպան Սերգեյ Կոպիրկինը՝ խոսելով հայ-ռուսական հարաբերությունների ներկա վիճակի մասին:
Դեսպանը փաստել է, որ երկու երկրներն այժմ բարդ ժամանակներ են ապրում, և տարածաշրջանում ու աշխարհում տեղի ունեցող փոփոխությունները պահանջում են ակտիվ քաղաքական երկխոսություն՝ երկկողմ հարաբերությունները նոր իրողություններին ադապտացնելու համար:
Սերգեյ Կոպիրկինի համոզմամբ՝ Հայաստանի և Ռուսաստանի ռազմավարական շահերը շատ հարցերում ընդհանուր են, իսկ երկու երկրների հարաբերությունների հիմքում հայ և ռուս ժողովուրդների բարեկամությունն է:
«Մենք, որպես ինքնիշխան պետություններ, շահագրգռված ենք ունենալու ամենասերտ հարաբերությունները: Մեզ շատ բան է միավորում, և այդ հարաբերությունները շատ կարևոր են մեր խաղաղ, անվտանգ և բարգավաճ ապագայի ապահովման համար՝ ինչպես Հայաստանի, այնպես էլ՝ Ռուսաստանի», - նշել է դեսպանը:
Դեսպանը նաև ընդգծել է, որ Ռուսաստանը ոչ միայն չի հեռանում Հարավային Կովկասից, այլև չի թուլացնում իր ուշադրությունը ո՛չ տարածաշրջանում տիրող իրավիճակի, ո՛չ էլ Հայաստանի Հանրապետության՝ որպես եղբայրական երկրի ու դաշնակցի հետ հարաբերությունների նկատմամբ: Դիվանագետը նաև հավելել է, որ Ռուսաստանը պատրաստ է աջակցություն ցուցաբերել Հայաստանի և Ադրբեջանի միջև հարաբերությունների կարգավորման գործընթացին և հարթակ տրամադրել երկու կողմերին խաղաղության համաձայնագրի ստորագրման համար:
Հարցազրույցն ամբողջությամբ՝ տեսանյութում:
Արամ Սարգսյան
