The Washington Post-ի տվյալներով՝ Ուկրաինան ծրագրում է նոր, բարդ և գաղտնի գործողություններ Ռուսաստանի տարածքում և նրա սահմաններից դուրս։ Խոսքը վերաբերում է անսպասելի վայրերում իրականացվելիք հարվածներին, որոնց նախապատրաստումը սկսվել է ավելի քան մեկուկես տարի առաջ։ Հունիսի 1-ի հարվածները ռուսական օդանավակայաններին, ըստ աղբյուրների, դիտարկվում են որպես հաջողակ փորձ՝ Կիևի անվտանգության ծառայության՝ ՍԲՈւ-ի գաղտնի օպերատիվ կարողությունների ցուցադրման։
Ամերիկյան կողմը, սակայն, մտահոգված է այդ զարգացումներով։ The Atlantic-ը նշում է, որ հենց հարձակման օրն էր նախատեսված նաև կարևոր բանակցություն Ստամբուլում, ինչը, ըստ Թրամփի, կարող էր խաթարել խաղաղության հաստատման հնարավորությունները։ ԱՄՆ նախագահի մոտ շրջապատը դժգոհ է Կիևի որոշումներից՝ համարելով, որ դրանք ավելորդ լարվածություն են ստեղծում Վաշինգտոնի ու Մոսկվայի միջև։
Բացի այդ, The Washington Post-ը նշում է, որ Ուկրաինայի հետախուզական ծառայությունները կարող են իրենց գործողությունները տարածել նաև այլ երկրներ, այդ թվում՝ Մոլդովա, Բելառուս, ինչպես նաև արևելաեվրոպական մի շարք երկրներ, որտեղ, ըստ հոդվածագրի, Կիևը ակտիվ կենտրոններ ունի։ Մոսկվան արդեն արձագանքել է՝ գիշերը հարվածներ հասցնելով ուկրաինական էներգետիկ ու ռազմարդյունաբերական օբյեկտներին, ինչը վկայում է, որ «ստվերային պատերազմը» կարող է դուրս գալ սահմաններից։
