ԱՄՆ-ը Ավստրալիայի կառավարությանը խնդրել է «որքան հնարավոր է շուտ» ավելացնել պաշտպանական ծախսերը մինչև ՀՆԱ-ի 3,5%-ը։ Այս մասին հայտնել է Պենտագոնի մամուլի ծառայությունը։
Այս կոչն արել է ԱՄՆ պաշտպանության նախարար Փիթ Հեգսեթը Ավստրալիայի իր գործընկեր Ռիչարդ Մարլզի հետ հանդիպմանը, որը տեղի է ունեցել ուրբաթ օրը Սինգապուրում Շանգրի-Լա երկխոսության ֆորումի շրջանակներում։ Մարլզն արդեն հայտնել է լրատվամիջոցներին, որ իր ամերիկացի գործընկերն իրեն կոչ է արել ավելացնել ռազմական ծախսերը, սակայն չի հստակեցրել, թե որքանով։
«Պաշտպանական ծախսերի մասով նախարար Հեգսեթը ասել է, որ Ավստրալիան պետք է որքան հնարավոր է շուտ հասցնի իր ռազմական ծախսերը ՀՆԱ-ի 3,5%-ին»,- ասվում է Պենտագոնի հայտարարության մեջ:
Երկու կողմերը նաև քննարկել են «հնդխաղաղօվկիանոսյան տարածաշրջանում անվտանգության ներդրումները, Ավստրալիայում ԱՄՆ ռազմական ներկայությունը մեծացնելու նախաձեռնությունների արագացումը, պաշտպանական արդյունաբերության համագործակցության զարգացումը և մատակարարման շղթայի ճկունության ամրապնդումը»:
