Թուրքիայի արտաքին գործերի նախարար Հաքան Ֆիդանը հայտարարել է, որ Թուրքիայի և Ռուսաստանի առաջնորդներ Ռեջեփ Թայիփ Էրդողանի և Վլադիմիր Պուտինի միջև վստահությունը պահպանվում է, և որ երկու նախագահներն էլ «անցել են կարևոր համաշխարհային փորձությունների միջով»:
Այս մասին նա ասել է Մոսկվայում՝ իր ռուս գործընկեր Սերգեյ Լավրովի հետ մամուլի ասուլիսում։
«Ռուսաստանի և Թուրքիայի միջև հարաբերությունների հիմնաքարը, իհարկե, մեր առաջնորդների վստահության հարաբերություններն են: Նախագահական դիվանագիտության շնորհիվ մենք կարող ենք ավելի արագ վճռական քայլեր ձեռնարկել երկկողմ հարաբերություններում և կարևոր որոշումներ կայացնել:
Ե՛վ Պուտինը, և՛ Էրդողանը երկու առաջնորդներ են, որոնք անցել են համաշխարհային կարևոր փորձությունների միջով: Նրանք միմյանց ճանաչում են երկար տարիներ, վստահելի հարաբերություններ են ձևավորել, և լավ գիտեն, թե ինչ հարցերի շուրջ են տարաձայնությունները և ինչ հարցերի շուրջ են համաձայն։ Եվ նրանք կարողանում են հասուն կողմնորոշվել տարաձայնությունների մեջ»,- ասել է Ֆիդանը։
Նա ընդգծել է, որ նախագահների միջև վստահության մթնոլորտը «իրոք երկու երկրների հարաբերությունների չափազանց կարևոր տարր է»։
