Իրանը և Միացյալ Նահանգները պետք է շարունակեն շփումները իրանական միջուկային հարցի շուրջ, քանի որ հակառակ դեպքում հնարավոր է լուրջ ճգնաժամ, հայտարարել է Ատոմային էներգիայի միջազգային գործակալության գլխավոր տնօրեն Ռաֆայել Գրոսսին։
«Մենք պետք է համոզվենք, որ երկխոսությունը շարունակվում է։ Որովհետև եթե կողմերը ասեն, որ այլևս չեն ցանկանում խոսել միմյանց հետ, ապա իրավիճակը լուրջ կլինի», – ասել է նա շաբաթ օրը հրապարակված «Corriere della sera» թերթին տված հարցազրույցում։
Գրոսսին ընդգծել է, որ չի սպասում, թե Իրանի և Միացյալ Նահանգների միջև շատ բարդ համաձայնագիրը կմշակվի։
«Ինձ թվում է, որ մենք խոսելու ենք պարզ բանի մասին՝ Թրամփի ոճով։ Օրինակ՝ ուրան չհարստացնել բոլոր պատժամիջոցների վերացման դիմաց», – ենթադրել է թերթի զրուցակիցը։
«Մենք պետք է աջակցենք դիվանագիտության ուղուն։ Խնդրի ռազմական լուծումը կլինի աղետ։ Եվ իրանական սպառնալիքները դատարկ խոսքեր չեն», – հավելել է Գրոսսին։
