ԱՄՆ նախագահ Դոնալդ Թրամփի վարչակազմը քննարկում է Հարվարդի համալսարանից բացի այլ համալսարաններ օտարերկրյա ուսանողների ընդունելության արգելք սահմանելու հնարավորությունը։ Այս մասին Fox News-ին տված հարցազրույցում հայտարարել է ԱՄՆ ներքին անվտանգության նախարար Քրիստի Նոեմը։
«Մենք անպայման քննարկում ենք սա։ Թող սա նախազգուշացում լինի մյուս բոլոր համալսարանների համար. մաքրվեք», -շեշտել է նա՝ անդրադառնալով լրագրողի հարցին։ Թրամփը և նրա վարչակազմը բազմաթիվ հայտարարություններ են արել Հարվարդի և այլ հեղինակավոր ամերիկյան համալսարանների վերաբերյալ։
Իշխանությունների կարծիքով՝ համալսարանը չի կարող ապահովել հրեական ծագում ունեցող ուսանողների լիակատար անվտանգությունը, որոնց սպառնում են պաղեստինամետ ակտիվիստները, որոնք դեմ են Իսրայելի կողմից Գազայի հատվածում իրականացվող ռազմական գործողություններին։
ԱՄՆ առողջապահության և սոցիալական ծառայությունների նախարարությունը չեղարկել է Հարվարդին տրամադրված 60 միլիոն դոլարի դաշնային դրամաշնորհները՝ այն պատճառով, որ այն չի կարողանում լուծել հակասեմականության, էթնիկ և ռասայական խտրականության հարցերը։
