Իսրայելի վարչապետ Բենիամին Նեթանյահուն հրամայել է ուժեղացնել անվտանգությունը իր երկրի բոլոր դիվանագիտական ներկայացուցչություններում՝ Վաշինգտոնում իսրայելցի երկու դիվանագետների սպանությունից հետո։
«Ես հրահանգներ եմ տվել՝ ուժեղացնել անվտանգության միջոցառումները Իսրայելի առաքելություններում ամբողջ աշխարհում, ինչպես նաև պետության ներկայացուցիչների անվտանգությունը», - ասել է վարչապետը՝ վարչապետի գրասենյակի տարածած հայտարարությունների համաձայն։
Խոսելով ամերիկյան մայրաքաղաքում տեղի ունեցածի մասին՝ նա կարծիք է հայտնել, որ ողբերգությունը Իսրայելի դեմ հրահրման և հակասեմիտիզմի հերթական դրսևորման արդյունք է։
«Մենք ականատես ենք Իսրայելի պետության դեմ հակասեմիտիզմի և վայրագ հրահրման սարսափելի գնին: Իսրայելի դեմ արյունալի զրպարտությունները արյուն են թափում և պետք է պայքարել մինչև վերջ: Իմ սիրտը ցավում է երիտասարդի և կնոջ ընտանիքների և սիրելիների համար, որոնց կյանքը կարճացրել է ստոր հակասեմական մարդասպանը», - ասել է Նեթանյահուն:
Վարչապետի աշխատակազմի հաղորդմամբ՝ ահաբեկչության լուրից հետո Նեթանյահուն զրուցել է ԱՄՆ-ում Իսրայելի դեսպան Յեչիել Լեյթերի և ԱՄՆ գլխավոր դատախազ Փամ Բոնդիի հետ, որոնք նրան հայտնել են տեղի ունեցածի մասին այս պահին հայտնի բոլոր մանրամասները։
