Մոսկվան Վատիկանից որևէ կոնկրետ առաջարկ չի ստացել Ուկրաինայում ստեղծված իրավիճակի կարգավորման հարցում համագործակցության համար, հայտարարել է ՌԴ նախագահի մամուլի քարտուղար Դմիտրի Պեսկովը։
«Ոչ, դեռ չի եղել, ոչ մի կոնկրետություն չկա», - ասել է Պեսկովը լրագրողներին՝ պատասխանելով հարցին, թե Վատիկանից եղե՞լ են կոնկրետ առաջարկներ Մոսկվայի հետ համագործակցելու՝ ուկրաինական կարգավորմանն աջակցելու համար։
Անցյալ ուրբաթ օրը Սուրբ Աթոռի պետքարտուղար կարդինալ Պիետրո Պարոլինը հայտարարեց, որ Հռոմի պապ Լև XIV-ը մտադիր է Վատիկանն առաջարկել որպես Ռուսաստանի և Ուկրաինայի միջև բանակցությունների վայր։ ԱՄՆ պետքարտուղար Մարկո Ռուբիոն շաբաթ օրը կարծիք է հայտնել, որ Վատիկանում ուկրաինական կարգավորման հարցով հանդիպման անցկացումը հարմարավետ կլինի հակամարտության երկու կողմերի համար։
Հռոմի Պապ Լևոն XIV-ն անցյալ շաբաթ հայտարարեց Սուրբ Աթոռի պատրաստակամության մասին՝ հանդես գալ որպես միջնորդ աշխարհում ռազմական հակամարտությունների կարգավորման գործում։ Ելույթ ունենալով արեւելյան եկեղեցիների ներկայացուցիչների հետ հանդիպմանը, նա ասել է, որ «Սուրբ Աթոռը բաց է, որպեսզի թշնամիները հանդիպեն ու նայեն միմյանց աչքերի մեջ»։
