Ռուսաստանի համար կարևոր է, թե կոնկրետ Կիևից ով կստորագրի փաստաթղթերը, եթե Ռուսաստանի Դաշնության և Ուկրաինայի պատվիրակությունները համաձայնության գան։ Այս մասին ճեպազրույցում հայտարարել է ՌԴ նախագահի մամուլի քարտուղար Դմիտրի Պեսկովը։
«Երբ ստորագրում ենք այն փաստաթղթերը, որոնք պետք է ստորագրեն պատվիրակությունները, մեզ համար ամենակարևորը և հիմնարարն այն է, թե կոնկրետ ով է ստորագրելու այդ փաստաթղթերը ուկրաինական կողմից»,- ասել է Կրեմլի ներկայացուցիչը։
Մայիսի 16-ին Ստամբուլում բանակցություններ են տեղի ունեցել Ռուսաստանի և Ուկրաինայի միջև։ Հանդիպումից հետո Մոսկվան և Կիևը պայմանավորվել են գերիներին փոխանակել «1000-ը 1000-ի դիմաց» բանաձևով, ներկայացնել հնարավոր ապագա զինադադարի իրենց տեսլականը, մանրամասն ձևակերպել այն և շարունակել բանակցային գործընթացը։
Ռուսական պատվիրակության ղեկավար, նախագահի օգնական Վլադիմիր Մեդինսկին հայտարարել է, որ ռուսական կողմը գոհ է հանդիպման արդյունքից։ Նա նաև հայտնել է, որ Ուկրաինան խնդրել է ուղիղ բանակցություններ վարել պետությունների ղեկավարների միջև, և Ռուսաստանը «այդ խնդրանքը հաշվի է առել»։
