Եվրահանձնաժողովը մեղադրանք է ներկայացրել TikTok սոցիալական հարթակին՝ խախտելու ԵՄ թվային ծառայությունների ակտի պահանջները։ Հիմնական խնդիրը՝ գովազդների թափանցիկության բացակայությունն է. TikTok-ը, ըստ ԵՄ-ի, չի ապահովում անհրաժեշտ տեղեկատվություն՝ գովազդի բովանդակության, թիրախավորված օգտատերերի և վճարողների վերաբերյալ։ Ըստ օրենքի, այսպիսի խախտման համար ByteDance-ը կարող է տուգանվել իր համաշխարհային շրջանառության մինչև 6%-ի չափով։
ԵՄ տեխնոլոգիական հարցերով հանձնակատար Հեննա Վիրկյունեն հայտարարել է, որ «առցանց գովազդի թափանցիկությունն՝ այն, թե ով է վճարում և ինչպես է թիրախավորվում լսարանը, հանրային շահի պաշտպանման առանցքային գործիք է»։ TikTok-ը, իր հերթին, հակադարձել է՝ հայտարարելով, որ համաձայն է կանոնների հիմնական նպատակների հետ, բայց չի կիսում հանձնաժողովի որոշ մեկնաբանություններն ու ձևաչափը, փոխանցում է Reuters-ը։
TikTok-ը նաև առանձին հետաքննության ներքո է՝ կապված ընտրությունների ժամանակ ռիսկերի կառավարման հետ։ Ընկերությունը կարող է պահանջել դիտարկել հանձնաժողովի փաստաթղթերը և գրավոր պատասխան ներկայացնել՝ մինչ վերջնական որոշման կայացումը։
